«2024»Í dag«Feb»
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29      
M T M H F L S

Leif Mohr Kring Føroyar 2024

Sum vanligt eru nýggir spennandi teinar á skránni. Eisini verður kappingarbyrjan flutt til seinni út á árið. Í 2022 og 2023 byrjaðu vit í mai mánað. Komandi ár verður byrja á Grundlógardegnum 5. juni.

Kappast verður í fimm dagar. Fimm feitar etapur, og kappast verður frá mikudegnum 5. juni til sunnudagin 9. juni.

Sum vanligt ber til at melda seg til ein, fleiri, ella allar teinar.

Sum nakað nýtt verður møguligt at melda til sum ”hugnasúkklari”. Her verður hugsað um tey, sum ikki hava hug at kappast, men hug at súkkla teinarnar. Hesi fáa eisini heiðursmerki um tey megna allar teinarnar. Umframt at fyriskipararar heiðra tey skjótastu, so verður eisini lutakast um ymsar vinningar ímillum øll sum luttaka. Hvør teinur man hevur súkklað, telur sum ein lutaseðil.

Í 2023 var mál í Klaksvík. Nú verður bæði startur og mál í Klaksvík fyrsta dagin í kappingini, tá einkulstarturin skal koyrast. Hann verður Klaksvík-Kunoy-Klaksvík. Ein spennandi og vøkur ruta, har møguleiki burdi verið fyri góðum tíðum.

Annan kappingardagin, sum verður fyrsti felagsstartur, flyta vit okkum longur suður til Eysturoynna. Startur og mál er við bygningin hjá Leif Mohr á Kambsdali. Tá súkklarnir koma á mál, hava teir súkkla av Kambsdali til Oyndarfjørð, aftur til Kambsdal, líka ein túr til Fuglafjarðar at royna ”Muntrabrekkuna”, og síðani á mál við Leif Mohr á Kambsdali.

Hóast teinarnir eru nýhugsaðir, so vitja vit sjálvandi Sandoynna í 2024, nú tað verður koyrandi til Sands. Her sleppur ein í 2024 at royna seg á meiri ”gravel” líknandi vegi, enn man oftani ger til súkklukappingar, tá rutan, umframt at vitja Skálavík, Sand, Húsavík, og Dal, eisini bjóðar uppá tvey umfar eftir ráa vegnum rundan um Sandsvatn. Her ræður um at hava tunguna mitt í munninum, og bæði eyguni á vegnum.

Suðuroyggin verður aftur á menu’ini í 2024. At kappast í Suðuroy er fantastiskt. At koyra runt í Hvalbiarbygd er eitt framúr upplivilsi. Komandi ár er ætlanin eisini at vitja Famjin. Málið verður í Vági.

Sunnudagin er finaludagur, og tá enda vit við finaluumførum við høvuðsbygningin hjá Leif Mohr á Hoyvíksvegnum í Havn.

Kappast verður sostatt á hesum oyggjum:

·         Borðoy

·         Eysturoy

·         Sandoy

·         Suðuroy

·         Streymoy

Fyrivarni verður tikið fyri møguligum broytingum, sum kunnu fyrikoma tá fyriskipararar, dómara og løgregla gjøgnumganga teinarnar.

Dagur 1, 1. etapa, mikudagin 5. juni:

Startur og mál verður við Effostøðina í Klaksvík. Kappast verður í Einkultstarti, og leiðin gongur úr Klaksvík, til Kunoy, til Kunoyarbygd har vent verður. Leiðin gongur nú aftur á mál í Klaksvík.

Longd á teini: 22 km. Hæddarmetrar uml 250.

Dagur 2, 2. etapa, hósdagin 6. juni:

Eysturoyggin verður karmur um 2. etapu av ársins útgávu av Leif Mohr Kring Føroyar 2024.

Tá verður kappast í felagsstarti, og teinurin sum verður koyrdur er frá Leif Mohr á Kambsdali, til Gøtu, Skálabotn, Oyndarfjørð, Skálabotn, Gøta, Kambsdalur, Fuglafjørð, Kambsdalur. Hetta er ein avbjóðandi teinur, eftirsum nakrar drúgvar brekkur eru á teininum.

Longd á teini: 59,5 km. Hæddarmetrar uml 1.800

Dagur 3, 3. etapa, fríggjadagin 7. juni:

3. etapa verður koyrd á Sandoynni. Startur og mál er í Húsavík. Sandoyggin er ein fantastisk "súkkluoyggj", og hevur Kring Føroyar fleiri ferð áður verið koyrd á oynni.

Hesa ferð gongur leiðin úr Húsavík til Sands. Nú verður koyrt runt um Sandsvatn, áðrenn leiðin gongur móti Skálavík har vent verður, og síðani aftur ein umgang rundan um Sandsvatn. So til Húsavíkar, og víðari til Dals har ventur verður, og so beinleiðis á mál í Húsavík.

Longd á teini: 54,5 km.  Hæddarmetrar uml. 1.000

Dagur 4, 4. etapa, leygardagin 8. juni:

4. etapan verður fyri 28. ferð í Suðuroy. Eisini ein spennandi og vøkur oyggj at kappast í. Byrjað verður á Tvøroyri. Leiðin gongur til Hvalba, runt í bygdini, og so gongur leiðin annars til Fámjin. Síðan verður farið um Hovsegg til Hov, til Porkeri, til Vágs og til Lopra. Her verður vent, og síðan verður súkklað á mál í Vági. Málið er við Effostøðina í Vági. 

Longd á teini: 72.5 km. Hæddarmetrar uml. 1.600

Dagur 5, 5. etapa, sunnudagin 9. juni:

Finalan og 5. etapa er tann sama sum í 2023.

Byrja verður í Tjørnuvík, gjøgnum tunnilin til Havnar. Komnir til Havnar verða 3 finaluumfør koyrd í Havn. 

Málið er við Leif Mohr, og fyriskipararnir fara at gera alt fyri, at finaluumførini verða so trygg sum yvirhøvur gjørligt soleiðis, at Hoyvíksvegur, Smyrilsvegur og Staravegur verða stongdir meðan finaluumførini verða koyrd. Roynt verður at fáa loyvi at Hoyvíksvegur verður tvídeildur soleiðis, at tey sum koyra á mál fyrstu ferð, koyra á uttara bana, og útbrotið í innara bana.

Longd á teini: 54 km. Hæddarmetrar uml. 1000

Kring Føroyar sá dagsins ljós í 1996. Føroyskir súkklarar høvdu vunnið fleiri heiðursmerkir á Oyggjaleikum í Gibraltar árið fyri, so nú mátti okkurt spennandi henda. Hetta var ein roynd at skipa fyri einari etapukapping í Føroyum, og í 1997 bleiv tað til eina veruliga kapping yvir fimm dagar, frá mikudag til sunnudag. Hetta verður so 28. ferð at skipað verður fyri Kring Føroyar súkklukappingini. 

Aftur í ár er tað Leif Mohr sum er høvuðsstuðul til kappingina.

Í skrivandi stund arbeiðir nevndin við at fáa kabaluna at ganga upp soleiðis, at kappingin verður í døgunum frá 5. til 9. juni. Trupulleikin er, at Tórshavnar Marathon verður 9. juni, tann dagin tá ætlanin er at vit enda í Havnini. Onkur broyging má gerast eftirsum vit ikki fáa loyvi at koyra ígjøgnum Kaldbakstunnilin, framvið Sundi og til Havnar. Meira um hetta seinni.